TEKS DRAMA SIRUNG PAJAJARAN

 

Sirung Pajajaran

Pulasari Pandeglang 10 Mei 1579

Sanggeus Karaton Pulasari Pandéglang kacangking ku wadyabalad Surasowan Banten, bénténg pamungkas Pajajaran di tungtung kulon runtag. Rahayat bubar katawuran, séwang-séwangan nyalametekeun diri. Sababaraha pamuda welasan taun tingkuniang tina panyalindungan dapuran hanjuang. Maranéhna, pamuda leungiteun harepan kahirupan.

Bujang 1: Jeueung ituh! Silalatu ti lebah karaton teu pareum-pareum! Leuh, dayeuh Pulasari tangtu geus jadi ruhak?!
Bujang 2: (Sedih) Bapa kuring tiwas katiruk panah lebah dadana. Indung katinggang tihang karaton nepi ka henteuna. Adi-adi … teuing kumaha nasibna …
Bujang 1: “Silalatu kalah beuki ngalobaan! (bari neuteup ka jauhna) Seuneu! Euleuh! Seuneu deui baé!? Tangtu geus ngalĕntab ka imah kuring!
Bujang 2: Hayam sakandang, kabĕh gĕhĕng jadi ruhak. Mangkaning meunang ngingu ti anakna kĕnĕh.
Bujang 1: Leuh! Leungit ge tangtu kabeuleum! Ti mana kuring dahar?
Bujang 3: Ieueueueueueueung! Ieu beuteung peurihhhhhhh! Lapar.
Lanjang1: Leuh karunya teuing? Ieu aya kĕnĕh bongborosan, lumayan keur ganjel beuteung.
Bujang 3: (bari nampanan) Geus dua poĕ ngan ngadaharan nu karieu, iraha atuh urang téh bakal manggih sangu?
Lanjang1: Wayahna wĕ atuh lur, batan peujit murilit kitu mah … Keun sugan engkĕ di pangungsian sĕjĕn urang manggih beubeutian …
Lanjang 2: Ah beubeutian nu kumaha deui, tangtu di lembur mana baé ogĕ geus teu nyĕsa! Nu puguh mah, urang bakal paéh kalaparan …
Bujang 1: Ngaleutikan silalatu téh ayeuna mah … Ngan baé, taya hartina. Urang moal bisa balik deui ka dayeuh Pulasari …
Bujang 2: Bangkĕ-bangkĕ sinatria pasolĕngkrah! Getih ngabayabah, maseuhan jukut, maseuhan tegalan! Bapa kuring, duh bapa …
Bujang 1: Meungpeung simpĕ, hayu urang miang deui!
Bujang 3: Miang? Miang ka mana?
Bujang 1: Nĕangan tempat nu leuwih aman!
Lanjang 1: Enya, bari sakalian nĕangan lembur nu rĕa kĕnĕh dahareunana!
Lanjang 2: Sarupaning kadaharan, tangtuna gĕ geus dirampas ku musuh.
Bujang 3: Tuh nya?! Mending gĕ cicing baé di dieu, bari ngadagoan nu ngaliwat.
Lanjang 1: Rĕk naon?
Bujang 3: Rĕk mĕnta babawaanana, sugan wĕ …..
Bujang 2: Montong!
Bujang 3: Naha?
Bujang 2: Teureuh Pajajaran mah tara kumawani ngarebut banda batur!
Bujang 3: Alaaaaah, dia mah sok adigung. Keur kalaparan kieu mah, kumaha wĕ atuh carana. Batan kudu paéh teu pupuguh ma?! (ka lanjang 1) Nya Nyai, kitu lin?
Lanjang 1: Ih, teuing atuh?!
Lanjang 2: Bener! Indung leungit bapa musna, teu dulur teu baraya, kuring mah haying kĕnĕh hirup.
Bujang 2: Kabĕh gĕ harayang kĕnĕh hirup, tapi loba kĕnĕh cara sĕjĕn pikeun ngeusian beuteung mah?!
Lanjang 2: (sinis) Eusian ku taneuh?
Bujang 2: Nya ari beuki mah pĕk baé!
Lanjang 2: Ari geus kudu dieusian ku naon ieu beuteung téh?
Bujang 2: Yeuh Nyai … Apan cĕk Patikrama gĕ, loba raja nu tatapa nahan lapar mangbulan bulan, sangkan dirina sakti mandraguna, teu teurak ku tumbak, teu teurak ku ruruhit jamparing, teu teurak ku ….
Bujang 3: Bohong! Geuning bapa kuring gĕ nu getol tatapa, dirempug ku wadyabalad Surasowan Banten mah tetep wĕ paéh?
Bujang 2: Paéh mah lain urusan bapa Manéh! Tapi urusan Hyang Tunggal!
Bujang 3: Alaaaah! Manéh mah sok kokolot begog! Kawas nu ngarti wĕ!
Bujang 2: Ah nya ngarti wĕ da sok ngadĕngĕkeun papatah kolot, manasina Manéh, nu diurusanan téh ngan dahareun baé!
Bujang 3: Atuh jalma teu dahar mah bakal paéh!
Bujang 2: Paéh téh lain ngan ukur teu dahar wungkul!
Bujang 3: Teu bisa! Nu pasti teu dahar mah tangtu paéh! Paéh! Paééééhhh! Wĕw!
Bujang 2: Teu, teu kitu! Buktina bapa Manéh nu kasohor beuki dahar, tara kakurangan dahareun, buktina ku musuh mah bisa paéh?
Bujang 3: Meureun wĕ bapa kuring keur cileureun, musuh teu kanyahoan datangna?!
Bujang 2: Lain ah! Puguh paéhna gĕ keur jaga lawang sakĕtĕng, keur nundutan, nu rampus mah puguh gĕ sok beuki hĕĕs!
Bujang 3: Ĕĕh? Manéh ngahina ka bapa dĕwĕk?
Bujang 2: Ah da kitu buktina …..
Bujang 3: Bukti kumaha? Cĕk saha hah?
Bujang 2: Cĕk bĕja …
Bujang 3: Ulah sadĕngĕ-dĕngĕna! Komo bapa Manéh mah paéhna gĕ leuwih hina!
Bujang 2: Hina? Hina kumaha?
Bujang 3: Apan katiruk panahna gĕ basa keur ngising dina rungkun, wĕw!
Bujang 2: Ngahina siah ka dĕwĕk?
Bujang 3: Manéh nu ngahina mah!
Bujang 2: Manéh !
Bujang 3: Manéh !
Bujang 2: Manéh !
Bujang 3: Manéh !

 

Subscribe to receive free email updates: